الطريقة اللي خلت كيكة الزبادي تطلع عالية وهشة وكأنها جاية من أرقى محل حلويات… سر بسيط قلب النتيجة 180 درجة!

طريقة عمل كيكة الزبادي في البيت بخطوات بسيطة وطعم ناعم وهش كيكة الزبادي واحدة من أسهل الوصفات اللي ممكن تتعمل في أي وقت، خصوصا لما تبقى عايز حاجة خفيفة تتاكل مع شاي بالليل أو فطار سريع، مكوناتها موجودة في كل بيت وطريقتها مش معقدة، وده اللي بيخليها من أكتر أنواع الكيك اللي ناس كتير بتعتمد عليها، المهم هنا هو ترتيب الشغل ودمج المكونات من غير استعجال، ووقتها هتلاقي كيكة عالية وهشة وطعمها ناعم جدًا.

طريقة عمل كيكة الزبادي الهشة

أول حاجة لازم تكوني مجهزة الفرن على درجة حرارة 180 قبل ما تبدأي، الخطوة دي بتخلي الكيكة تستوي كويس وما تهبطش جهزي صينية مقاس متوسط وادهنيها خفيف بزبدة أو زيت ورشي عليها دقيق بسيط، في بولة كبيرة، اكسري البيض وضيفي الفانيليا ومعاهم شوية خل، الخل هنا بيشتغل كعامل مساعد يخلي الكيكة ترتفع وتبقى هشة من جوه، اخلطي البيض كويس لحد ما لونه يفتح سنة، وبعدها زودي السكر وكملي ضرب، لما الخليط يتجانس، انزلي بالزبادي والزيت وقلبي لحد ما تحسي إن المزيج كله بقى سايح في بعض بشكل ناعم.

الخطوة الثانية

في بولة تانية، حطي الدقيق مع البيكنج بودر ورشة ملح، وقلبيهم مع بعض كويس، بعد كده ابتدي دخلي الدقيق على الخليط السائل تدريجيًا وبراحة، التقليب لازم يكون بالسباتولا ومن تحت لفوق، من غير ما “تعجني” العجين، علشان ما تخليش الكيكة قاسية أو مكتومة.

بعد ما الخليط يبقى جاهز، صبيه في الصينية، وساوي السطح بظهر معلقة من غير ضغط خبطة خفيفة للصينية على الرخامة هتطلع أي فقاعات هوا زيادة، دخليها الفرن على الرف الأوسط وسيبيها تاخد وقتها من غير ما تفتحي الباب بدري. بعد حوالي نص ساعة، جربي بعود خشب، لو طلع نظيف تبقى الكيكة جاهزة.

بعد ما تطلع، سيبيها تهدى شوية قبل التقطيع، هي في الأساس كيكة بسيطة، بس تقدر تتزود بنكهات خفيفة تغير طعمها، زي بشر الليمون اللي بيدي نكهة منعشة جدًا، أو شوية جوز هند في العجينة، أو حتى تبديل جزء من الدقيق بكاكاو لو عايزة نسخة شوكولاتة.

كيكة الزبادي الشكل النهائي

المهم في كيكة الزبادي إن المكونات تبقى بدرجة حرارة الغرفة، وإن الدقيق يكون منخول، وإن التقليب يكون هادي من غير مبالغة، التفاصيل الصغيرة دي هي اللي بتفرق وبتخلي النتيجة في الآخر ناعمة، عالية، وطعمها فعلاً يشجع إنك تعمليها تاني يوم، جربيها بالطريقة دي وهتحسي إنك رجعتي لزمن الكيكة البيتي اللي ريحتها بتفكرك بأيام زمان، بسيطة بس طعمها صادق ولذيذ.